Author: betim musliu (betim musliu)

Ambasadorja Amerikane në Kosovë, Tracy Jacobson ka shfrytëzuar rrjetin social Twiter për të komentuar rreth zgjedhjeve.

Në komunën e Gjilanit, qytetaret kanë nisur të votojnë, njëherit edhe zyrtaret e komisioneve zgjedhore në komunat përreth kanë konfirmuar për Kosovapress se procesi ka nisur me kohë dhe po vazhdon normalisht. Deri më tani po vërehet interesim i qytetarëve për të votuar.

Kandidati i Aleancës për Ardhmërinë e Kosovës, Besnik Tahiri, ka votuar në shkollën “Dardania”, qendra e votimit 1904a, ku pas votimit të tij, erdhi edhe lideri i kësaj partie , Ramush Haradinaj, për ta përkrahur dhe uruar.

Presidentja e Kosovës, Atifete Jahjaga së bashku me bashkëshortin e saj kanë votuar në Sallën 1 Tetori në Prishtinë.

Prokurorja e Shtetit dhe Policia e Kosovës  kanë bërë të ditur se një person është arrestuar në fshatin Cërcë të Istogut, pasi ka tentuar ta mbyllë objektin ku mbahen votimet.

Sikur edhe në të gjitha komunat në Prizren janë hapur të gjitha qendrat e votimit për zgjedhjet lokale. Kryesuesi i Komisionit Komunal Zgjedhor, Nysret Bytyqi ka konfirmuar për Kosovapress, se të gjitha vendvotimet janë hapur me kohë dhe nuk ka pasur asnjë problem rreth hapjes së tyre.

Kryeministri i Kosovës, Hashim Thaci, ka deklaruar se këto janë zgjedhjet historike për shtetin tonë për shkak se janë zgjedhjet e para  të lira që organizohen në tërë territorin e Kosovës.

Lideri i Aleancës për Ardhmërinë e Kosovës, Ramush Haradinaj ka votuar në shkollën e mjekësisë në kryeqytet.

Lidhja Demokratike e Kosovës e ka vlerësuar të rregullt procesin zgjedhor, por ka njoftuar edhe për parregullsi që kanë ndodhur në vendvotime të ndryshme në vend.

Në Kaçanik të vjetër është arrestuar një vëzhgues për shkak se e ka shënuar një kuti të votimit. Kjo është bërë nga përfaqësues të DnV-së , të cilët thanë se kjo ka ndodhur rreth orës 10:00.